قصيدة شاعر الأمراء الامام / تركي بن عبدالله اّل سعود

اليكم قصيدة شاعر الأمراء الامام / تركي بن عبدالله اّل سعود رحمه الله مؤسس الدولة السعودية الثانية والتي أرسلها إلى ابن عمه مشاري يحثه على الهرب من مصراللتي كان أسيرا فيها يقول:
طار الكرى عن موق عيني وفرا
= وفزيت من نومي طرا لي طواري
وأبديت من جاش الحشى ما تدرا
= وأسهرت من حولي بكثر الهذاري
خط لفاني زاد قلبي بحرا
= من شاكي ضيم النيا والعزاري
سر يا قلم واكتب على ما تورا
= أزكى سلام لابن عمي مشاري
شيخ على درب الشجاعة مضرا
= من لابة يوم الملاقا ضواري
أشكي لمن يبكي له الجود طرا
= ضراب هامات العدا ما يداري
يا حيف يا خطو الشجاع المضرا
= في مصر مملوك لحمر العتاري
من الزاد غاد له سنام وسرا
= من الذل شبعان من العز عاري
وش عاد لو تلبس حرير يجرا
= وامتوج تاج الذهب بالزراري
دنياك يا ابن العم هذي مغرا
= ولا خير في دنيا حلاها مراري
تسقيك حلو ثم تسقيك مرا
= ولذاتها بين البرايا عواري
اكفخ بجنحان السعد لا تدرا
= فالعمر ما ياقاه كثر المداري
ما في يد المخلوق نفع وضرا
= ما قدر الباري على العبد جاري
واسلم وسلم لي على من تورا
= واذكر لهم حالي وما كان جاري
يوم إن كل من خويه تبرا
= خليت الأجرب لي خوي مباري
ورميت عني برقع الذل برا
= ولا خير في من لا يدوس المحاري
نعم الصديق الى سطا ثم جرا
= يودع مناعير النشاما حباري
ونزلتها غصب بخير وشرا
= وجمعت شمل بالقرايا وقاري
وحصنت نجد عقب ما هي تطرا
= مصيونة عن حر لفح المذاري
والشرع فيها قد مشى واستقرا
= ويقرأ بنا درس الضحى كل قاري
زال الهوى والغي عنها وفرا
= ويقضي بها القاضي بليا مصاري
وأجهدت في طلب العلى لين قرا
= وطاب الكرى مع لابسات الخزاري
ومن غاص غبات البحر جاب درا
= ويحمد مصابيح السرى كل ساري
وأنا أحمد اللي جاب لي ما أتحرا
= وأذهب غبار الذل عني وطاري
والعمر ما يزداد مثقال ذرا
= عمر الفتى والرزق في كف باري

تحياتي اختي نبضه يبيها

شكرا على القصيدة

وعلى فكره انا احب اقراء عن تاريخ آل سعود ... ومهتم بتاريخهم

(( راعي العلوم الغانمة تسلم لنا يمناه )) فديت ابو متعب

تسلم اخوي على مرورك واذا عندك معلومات او شعر اتحفنا ننتظرك شكرا

شكرا كيم والله تحرجني بذوقك يعطيك العافيه